கர்ப்பிணி பெண்களுக்கு சீர்வரிசை, அறுசுவை உணவு; அரசு திட்டங்கள் குறித்து அமைச்சர் கயல்விழி விளக்கம்.
திருப்பூர் மாவட்டம் தாராபுரம் சட்டமன்ற தொகுதிக்குட்பட்ட குண்டடம், மூலனூர் உள்ளிட்ட 3 ஒன்றியங்களில் சமுதாய வளைகாப்பு நிகழ்ச்சி நடைபெற்றது. சமூக நலன் மற்றும் மகளிர் உரிமைத்துறையின் சார்பில், ஒருங்கிணைந்த குழந்தை வளர்ச்சிப் பணிகள் (ICDS) திட்டத்தின் கீழ் கர்ப்பிணி பெண்களுக்கு இந்நிகழ்ச்சி 2026ஆம் ஆண்டு தனியார் திருமண மண்டபங்களில் ஏற்பாடு செய்யப்பட்டது.
நிகழ்ச்சிக்கு 400க்கும் மேற்பட்ட கர்ப்பிணி தாய்மார்கள் கலந்து கொண்டனர். பாரம்பரிய முறையில் ‘பெண் வீட்டு சீதனம்’ போன்று வளைகாப்பு நடத்தப்பட்டு, 16 வகையான சீர்வரிசை பொருட்கள் வழங்கப்பட்டன.
நிகழ்ச்சிக்கு தலைமை வகித்த மனிதவள மேம்பாட்டு துறை அமைச்சர் கயல்விழி செல்வராஜ், கர்ப்பிணி பெண்களின் சுகாதாரம், பாதுகாப்பு மற்றும் சத்துணவு குறித்து அரசு மேற்கொண்டு வரும் பல்வேறு நடவடிக்கைகள் குறித்து விளக்கினார்.
அவர் கூறுகையில், கர்ப்பிணி பெண்களுக்கு ஒருங்கிணைந்த குழந்தை வளர்ச்சித் திட்டத்தின் மூலம் ஊட்டச்சத்து மிகுந்த உணவுப் பொருட்கள், முட்டை, பால், சத்துணவு கலவை, மாதாந்திர மருத்துவ பரிசோதனை, இரும்பு மற்றும் கால்சியம் மாத்திரைகள் வழங்கப்படுகின்றன. மேலும், அரசு மருத்துவமனைகள் மற்றும் ஆரம்ப சுகாதார நிலையங்களில் இலவச கர்ப்ப கால பரிசோதனைகள், பாதுகாப்பான பிரசவ வசதிகள், பிறந்த குழந்தைக்கு தடுப்பூசி மற்றும் தொடர்ந்து சத்துணவு ஆதரவு வழங்கப்படுவதாக தெரிவித்தார்.
இந்த சமுதாய வளைகாப்பு விழாவில் கர்ப்பிணி பெண்களுக்கு வழங்கப்பட்ட 16 வகை சீர்வரிசை பொருட்களில் புடவை, வளையல், நாட்டு நெய், பேரீச்சம் பழம், பாதாம், உளுந்து, கடலை, சீரகம், மிளகு, சக்கரை, கற்கண்டு, ஆரோக்கிய கலவை மாவு, தேங்காய், பழங்கள், தானியங்கள் மற்றும் பிற ஊட்டச்சத்து பொருட்கள் இடம்பெற்றிருந்தன.
மேலும், கலந்து கொண்ட கர்ப்பிணி பெண்களுக்கு அறுசுவை உணவு பரிமாறப்பட்டது. சாதம், பருப்பு, காய்கறி குழம்பு, கூட்டு, பொரியல், தயிர், இனிப்பு உள்ளிட்ட ஆறு வகையான சத்துணவு உணவுகள் வழங்கப்பட்டன.
இந்நிகழ்ச்சியில் நகர மன்ற தலைவர் பாப்பு கண்ணன், நகரச் செயலாளர் முருகானந்தம், குண்டடம் ஒன்றிய செயலாளர் சந்திரசேகரன், ஈஸ்வரர் செட்டிபாளையம் முன்னாள் தலைவர் ஈஸ்வரன், மூலனூர் ஒன்றிய செயலாளர் பழனிச்சாமி, துரை தமிழரசு, பேரூராட்சி செயலாளர்கள் மக்கள் தண்டபாணி, சுரேஷ்குமார் மற்றும் சமூக நலத்துறை அதிகாரிகள் உள்ளிட்டோர் கலந்து கொண்டனர்.
கர்ப்பிணி பெண்களின் நலனை முன்னிறுத்தி அரசு மேற்கொண்டு வரும் திட்டங்கள் சமூகத்தில் நல்ல வரவேற்பைப் பெற்று வருவதாகவும், தாயும் குழந்தையும் ஆரோக்கியமாக இருப்பதே இத்திட்டங்களின் முக்கிய நோக்கமாகும் என்றும் அமைச்சர் தெரிவித்தார்.
மாவட்ட செய்தியாளர் அ.காஜா மைதீன் தமிழக குரல் இணையதள செய்தி பிரிவு
கருத்துகள் இல்லை:
கருத்துரையிடுக