ஓ.பி.எஸ் – ஸ்டாலின் சந்திப்பு: வழி பிறந்ததா? அல்லது வேறு வழி இல்லையா?

முன்னாள் முதல்வர் திரு. ஓ.பன்னீர்செல்வம் மற்றும் தற்போதைய தமிழ்நாடு முதல்வர் திரு. ஸ்டாலின் இடையேயான சமீபத்திய சந்திப்பு தமிழக அரசியலில் புதிய விவாதங்களை கிளப்பியுள்ளது. இது ஒரு அரசியல் மரியாதை சந்திப்பா? அல்லது அடுத்த கட்ட அரசியல் நகர்வுக்கான அடித்தளமா? என்ற கேள்வி எழுந்துள்ளது.

அதிமுகவிலிருந்து உச்சிக்குச் சென்ற ஓ.பி.எஸ்

அதிமுகவின் அடிப்படை உறுப்பினராக அரசியல் பயணத்தை தொடங்கிய ஓ.பன்னீர்செல்வம், மறைந்த ஜெயலலிதா அவர்களின் நம்பிக்கைக்குரியவராக உயர்ந்து, மூன்று முறை தமிழக முதல்வராக பதவி வகித்தவர்.

ஜெயலலிதா மறைவிற்குப் பிறகு ஏற்பட்ட உட்கட்சி அதிகாரப் போட்டி, குறிப்பாக சசிகலா தலைமையிலான அணியுடன் ஏற்பட்ட மோதல், “தர்மயுத்தம்” எனப்படும் அரசியல் போராட்டத்தை உருவாக்கியது. பின்னர் எடப்பாடி பழனிச்சாமி உடன் சமரசம் செய்து, அதிமுக ஒருங்கிணைப்பாளராக பொறுப்பு ஏற்றார். ஆனால், “ஒற்றைத் தலைமையாக்கம்” என்ற அரசியல் திட்டத்தின் பின்னணியில், ஓ.பி.எஸ் கட்சியில் ஓரங்கட்டப்பட்டார். தொடர்ந்து சட்டப்போராட்டங்கள், பொதுக்கூட்டங்கள், “அதிமுக தொண்டர்கள் உரிமை மீட்பு குழு” என்கிற அமைப்பு தொடக்கம்—இவை அனைத்தும் அவரின் அரசியல் இருப்பை நிலைநிறுத்தும் முயற்சிகளாக இருந்தன.

அந்த அமைப்பு பின்னர் கழகமாக மாறியது. இதன் மூலம் அவர் தனிக் கட்சி தொடங்குவார் என்ற அரசியல் ஊகங்கள் பலம் பெற்றன.

“தை பிறந்தால் வழி பிறக்கும்” – எந்த வழி?

சில மாதங்களுக்கு முன் செய்தியாளர்களிடம் ஓ.பி.எஸ் கூறிய “தை பிறந்தால் வழி பிறக்கும்” என்ற கூற்று, புதிய அரசியல் அமைப்பு அறிவிப்புக்கான முன்னோட்டமாகவே கருதப்பட்டது. ஆனால், அதற்குப் பிறகு நடந்த அரசியல் நிகழ்வுகள் வேறொரு திசையைச் சுட்டிக்காட்டின. அவரின் ஆதரவு சட்டமன்ற உறுப்பினர் ஒருவர், முதல்வர் ஸ்டாலினை பாராட்டி, மீண்டும் அவர் முதல்வராக வருவார் என வெளிப்படையாகக் கூறியது கவனத்தை ஈர்த்தது. அதனைத் தொடர்ந்து, ஓ.பி.எஸ் நேரடியாக ஸ்டாலினை சந்தித்து, திமுக அரசின் செயல்பாடுகளை பாராட்டியதுடன், “தை பிறந்தால் வழி பிறக்கும்” என்ற தனது கூற்றுக்கு இதுவே விளக்கம் என கூறியதாக தகவல்கள் வெளியானது.

விசுவாசம் vs அரசியல் வாழ்வு

மறைந்த எம்.ஜி.ஆர் மற்றும் ஜெயலலிதா மீது தீவிர விசுவாசம் கொண்டவர் என கருதப்பட்ட ஓ.பி.எஸ், திமுகவிற்கு சாதகமாக செயல்படுவது பலரையும் ஆச்சரியப்பட வைத்துள்ளது.

இதற்கு பின்னால் உள்ள அரசியல் கணக்கு என்ன?

1. அதிமுகவில் மீண்டும் பதவி வாய்ப்பு என்பது இல்லை என உறுதியாகிவிட்டது, அதற்கான நீண்டகால சட்டப்போராட்டங்களும் அரசியல் முயற்சிகளும் பலனளிக்காத சூழல்.

2. அரசியல் இருப்பை பாதுகாக்க வேண்டிய கட்டாயம், தனிக் கட்சி தொடங்கினாலும், அமைப்பு வலிமை மற்றும் வாக்கு வலிமை பற்றிய கேள்விகள் பதிலற்றது.

3. திமுகவுடன் வியூக ரீதியான அணுகல், எதிர்கால தேர்தலில் கூட்டணி வாய்ப்பு, சில தொகுதிகள் ஒதுக்கீடு போன்ற அரசியல் சமநிலை ஆகியவற்றிக்கான முயற்சியாக பார்க்கப்படுகிறது.

அடுத்த கட்டம் என்ன?

இனி நடைபெறக்கூடிய சாத்தியங்கள்:

• ஓ.பி.எஸ் தலைமையிலான கழகம் திமுக கூட்டணியில் இணையலாம்.

• அல்லது அவரும் அவரின் ஆதரவாளர்களும் நேரடியாக திமுகவில் இணையும் இணையலாம்.

• வரும் சட்டமன்ற தேர்தலில் அவருக்கு சில தொகுதிகள் ஒதுக்கீடு செய்யப்பட்டு, அவரது ஆதரவாளர்களுக்கு அரசியலில் இடம் வழங்கப்படலாம்.

இந்த சந்திப்பு, ஒரு சாதாரண அரசியல் மரியாதை பரிமாற்றமா? அல்லது, அரசியல் வாழ்வாதாரத்திற்கான கட்டாய முடிவா? “வழி பிறந்ததா?” என்ற கேள்விக்கு அரசியல் நேரமே பதில் அளிக்கும். ஆனால், தற்போதைய சூழலில் இது ஒரு திடீர் உணர்ச்சி முடிவு அல்ல; கணக்கிட்ட அரசியல் நகர்வாகவே பார்க்கப்படுகிறது. தமிழக அரசியலில் அடுத்த சில மாதங்கள், ஓ.பி.எஸ் அரசியல் பயணத்தின் புதிய திசையைத் தீர்மானிக்கும் என்பது உறுதி.