நெல்லை அரசு மருத்துவமனையில் ரத்ததான முகாம்.

ரத்ததானம் செய்வோம்; உயிர்களைக் காப்போம் - நெல்லை அரசு மருத்துவமனையில் ரத்ததான முகாம் அமைப்பாளர்களுக்கு பாராட்டு விழா.

திருநெல்வேலி: திருநெல்வேலி அரசு மருத்துவக் கல்லூரி மருத்துவமனையில், 'தேசிய தன்னார்வ குருதி கொடை தினத்தை' முன்னிட்டு, ரத்ததான முகாம்களை முன்னின்று நடத்திய அமைப்பாளர்களைக் கௌரவிக்கும் விழா மற்றும் ரத்ததான விழிப்புணர்வு நிகழ்ச்சி இன்று (ஜனவரி 8) சிறப்பாக நடைபெற்றது. 

தந்தை ஜே.ஜி. ஜாலியின் நினைவாக:

இந்திய ரத்த மாற்ற மருத்துவத்தின் தந்தை (Father of Transfusion Medicine in India) எனப் போற்றப்படும் ஜே.ஜி. ஜாலி பிறந்த நாளை முன்னிட்டு ஒவ்வொரு ஆண்டும் ரத்த தான தினம் அனுசரிக்கப்படுகிறது. 

இந்த ஆண்டிற்கான கருப்பொருளாக, உலக சுகாதார நிறுவனம் வழங்கியுள்ள "ரத்ததானம் செய்வோம், நம்பிக்கையை கொடுப்போம், ஒன்றாக இணைந்து உயிர்களைக் காப்போம்" (Give Blood, Give Hope: Together We Save Lives) என்ற வாசகத்தை முன்னிறுத்தி இவ்விழா கொண்டாடப்பட்டது.

நிகழ்ச்சியில் திருநெல்வேலி மருத்துவக் கல்லூரி மருத்துவமனை முதல்வர் (டீன்) டாக்டர் ரேவதி பாலன் செய்தியாளர்களிடம் பேசுகையில், "கடந்த 2025-ம் ஆண்டில் மட்டும் நமது ரத்த வங்கியில் 11,803 ரத்த அலகுகள் சேகரிக்கப்பட்டுள்ளன. இதன் மூலம் சுமார் 20,352 ரத்தக் கூறுகள் (Blood Components) பிரிக்கப்பட்டு, மருத்துவமனையில் சிகிச்சை பெறும் ஏழை, எளிய மக்களுக்கு வழங்கப்பட்டுள்ளது. 

சென்னை மற்றும் மதுரைக்கு அடுத்தபடியாக நமது மருத்துவமனை ரத்த வங்கி சிறப்பாகச் செயல்பட்டு வருகிறது," என்று பெருமிதத்துடன் தெரிவித்தார்.

யாரெல்லாம் பயனடைகிறார்கள்?

இங்கே பெறப்படும் ரத்தம் மற்றும் ரத்தக் கூறுகள் முக்கியமாக:

ரத்த சோகையினால் பாதிக்கப்படும் கர்ப்பிணிப் பெண்கள்.

விபத்து மற்றும் அவசர சிகிச்சை தேவைப்படும் நோயாளிகள்.

 புற்றுநோயால் பாதிக்கப்பட்டு சிகிச்சை பெறுவோர்.

எலும்பு முறிவு மற்றும் முக்கிய அறுவை சிகிச்சை மேற்கொள்பவர்களுக்குப் பெரிதும் பயன்படுத்தப்பட்டு உயிர்கள் காக்கப்படுகின்றன.

ரத்ததானத்தின் முக்கியத்துவத்தை உணர்ந்து, தன்னார்வத்துடன் முகாம்களை ஏற்பாடு செய்த 80 அமைப்பாளர்களுக்குப் பாராட்டுச் சான்றிதழ்கள் வழங்கி கௌரவிக்கப்பட்டது. 

குறிப்பாக, ஐ.என்.எஸ் கட்டபொம்மன் (INS Kattabomman) கடற்படை தளம், மணிமுத்தாறு தமிழ்நாடு சிறப்பு காவல் படை (TSP) முகாம் ஆகியவற்றிலிருந்து வந்து ரத்ததானம் செய்தவர்களுக்கும், முகாம் அமைப்பாளர்களுக்கும் சிறப்பு நன்றிகள் தெரிவிக்கப்பட்டது.

இந்த விழாவில் மருத்துவக் கல்லூரி உதவி முதல்வர் டாக்டர் சுரேஷ் துரை, மருத்துவக் கண்காணிப்பாளர் டாக்டர் பாலசுப்ரமணியன், ரத்த வங்கித் துறைத் தலைவர் டாக்டர் உமேஷ், டாக்டர் ஜே. ரவிசங்கர் மற்றும் பல்வேறு துறைகளின் பேராசிரியர்கள், செவிலியர்கள் மற்றும் மாணவர்கள் திரளாகக் கலந்துகொண்டனர். டாக்டர் பிரதிபா நன்றியுரை ஆற்றினார்.