கடலூர் மாவட்டம், ஸ்ரீமுஷ்ணத்தில் பருவமழை தொடங்கியுள்ள நிலையில், டெங்கு காய்ச்சல் பரவலைத் தடுக்கும் வகையில் அரசினர் மேல்நிலைப்பள்ளி மாணவ, மாணவிகள் மற்றும் வேளாண்மை மற்றும் தொழில்நுட்பக் கல்லூரி மாணவ, மாணவிகள் இணைந்து டெங்கு விழிப்புணர்வுப் பேரணி நடத்தினர்.
இந்தப் பேரணிக்கு விளையாட்டு ஆசிரியர் சத்யராஜ் தலைமை தாங்கினார். இதில் பார்த்திபன், கல்லூரி மாணவி ஹரிதா உள்ளிட்ட மாணவ, மாணவிகள் கலந்துகொண்டு பொதுமக்களிடையே டெங்கு காய்ச்சல் தடுப்பு குறித்த விழிப்புணர்வை ஏற்படுத்தினர்.
பள்ளியில் இருந்து தொடங்கிய இந்தப் பேரணி, ஸ்ரீமுஷ்ணம் கடைவீதிகள் வழியாகச் சென்றது. பேரணியில் பங்கேற்ற மாணவ, மாணவிகள் டெங்கு காய்ச்சலைத் தடுப்பது தொடர்பான விழிப்புணர்வுப் பதாகைகளை ஏந்திச் சென்று பொதுமக்களுக்கு பல்வேறு அறிவுரைகளை வழங்கினர்.
குறிப்பாக, பருவமழைக் காலங்களில் வீடுகள் மற்றும் சாலைகளில் மழைநீர் தேங்காமல் பார்த்துக்கொள்ள வேண்டும் என்றும், தேங்காய் மட்டைகள், பழைய டயர்கள் உள்ளிட்ட தண்ணீர் தேங்கக்கூடிய பொருட்களை அகற்ற வேண்டும் என்றும் வலியுறுத்தினர். மேலும், திறந்தவெளிப் பாத்திரங்கள் மற்றும் தேவையற்ற பொருட்களில் தண்ணீர் தேங்குவதால் கொசுக்கள் உற்பத்தியாகும் வாய்ப்பு இருப்பதால், சுற்றுப்புறங்களைத் தூய்மையாக வைத்திருக்க வேண்டும் என அறிவுறுத்தினர்.
டெங்கு காய்ச்சலைப் பரப்பும் கொசுக்கள் உற்பத்தியாவதைத் தடுப்பதன் மூலம் நோய்ப் பரவலைக் கட்டுப்படுத்த முடியும் என்றும், ஒவ்வொருவரும் தங்களது வீடுகள் மற்றும் சுற்றுப்புறங்களைப் பாதுகாப்பாக வைத்துக்கொண்டால் குடும்பத்தினரையும் பொதுமக்களையும் நோய்ப் பாதிப்பிலிருந்து பாதுகாக்க உதவ முடியும் என்றும் மாணவ, மாணவிகள் விழிப்புணர்வு ஏற்படுத்தினர்.
பருவமழைக் காலத்தில் டெங்கு காய்ச்சல் தடுப்பு நடவடிக்கைகளில் பொதுமக்கள் ஒத்துழைப்பு அளிக்க வேண்டும் என்பதை வலியுறுத்தும் வகையில் நடைபெற்ற இந்த விழிப்புணர்வுப் பேரணி, ஸ்ரீமுஷ்ணம் பகுதி மக்களிடையே சுகாதார விழிப்புணர்வை ஏற்படுத்தும் நிகழ்வாக அமைந்தது.
செய்தியாளர்
ஸ்ரீமுஷ்ணம் சண்முகம்
கருத்துகள் இல்லை:
கருத்துரையிடுக